(الإهداء إلى روح شقيقتي وصديقتي وحبيبتي نايلة صديق الملك)
سويتلك عقد وقويشة
من انضر بلح قونديل
وساهرت ليل بي حالو
شان انسج من السعف اكليل
يليق بي راسك المرفوع
ونصبتك اميرتي عدييل
……………….
وسريت يا نايلة
بين (مساوي) و(الحلفايا)
ذاكرت الجذور وبكيت..
وركيت في شراع مركب
قصاد بانت في عرض النيل
صرخت من الوجع مجروح
آه يانايلة نار فقدك شوتني عديل
فاض أبوعنجة بي دمعو
نزل مطر الرماد يا نايلة
واتحكر في شارع الفيل
وقع سوق بانت المهدود
برك من حزنو غلبو الشيل
…………………
آه يانايلة بتذكر ونحن صغار
لعبنا سوا
مشينا سوا
ضحكنا سوا
نتسابق في عرض الحوش
تقول اندر جنس في الخيل
لعب البلي يانيلي
والكوتشينة
كمان حرينا
تقولك امي بت جنة
دحين يانايله انتي ولييد؟؟
ده امر عجيب
وتضحكي ذي وتر عصفور
تقوليلا ده هاشم اخوي
قريب وحبيب
ماهو غريب
…
أغمض وتجري تدسي.
افتش ليك ورا الأبواب
وفي الديوان
وفي الاركان
وكل البيت
وجنينه الوالد الوارفة.
ابوي صديق
واخوك كان في الصغر عفريت
امثل اسأل عنك الحنه
اقول ليها وين نايلة مدسة؟
تتضاحك وتتمايل
تقول
مرت هناك هسة
اسأل ابوك صديق واسأل آمنة بت جنة
واسأل عنك الفلة
اقول ليها وين نايلة مدسة
تقول ماعارفة
كت نعسانة
اخدت لي غمضة
واسأل
والياسمينة والجوافة
والريحانة والليمونة
واللارنجة.. اللارنجة يا نايلة
افتش ليك افتش ليك
أقرب اسأل الحلة
واسمع ضحكك المكتوم
تراك يا نايلة فووق في
النيمة مدسة
وتنزلي لي
واجري عليك واقبض فيك
ونضحك من قلب مفتوح
في زمنا أصيل ونبيل
…
اه يانايله اسع وبين
جنينة الوالد الوارفة
تصبح فيك
تمسي عليك
حل محلها
السيراميك
كضاب ذي كتير من ناس
يبهر فيك
يضحك ليك
يلمع ليك
يطمن فيك
وفجأة يزلقك
يرميك
يكسر فيك
يدشدش فيك
…………………….
اتذكر مشينا السينما
متماسكين
وكم مشوار مشينا سوا
رقيصنا سوا في
أعراس الأهل يا نايلة
فرحانين تقول طايرين
…
واتذكر سفرنا سواء
مع الوالد واخوي حسن
للختمية في كسلا
حليل ناسها وحليل أهلها
نطلع للجبل جارين
نصل توتيل
لابنفتر ولااا فد مرة
مات الحيل
واتذكر في القطر راجعين
شكلنا سوا
منو البقعد على الشباك
يعاين للخلا المفتوح
جميل أخضر
يرد الروح
محطة تجي محطة تروح
والمشهد
يشد عينيك ويشد الحيل
………………….
واتذكر صباك يا نايلة
والمنسج
هديتك لي طاقية
وكم في مرة طرزتي
هديتك لي كان منديل
كان ابيض متل جواك
عزييز وجميل
………………
اه يا نايلة
بعد هاجرتي لي مدني
بتذكر
كل صباح يرن الهاتف المحمول
واسمع صوتك الرويان
بالحنين مغسول
تسابقيني
_هاشم اخوي ود أمي
صباح الخير
آه يانايلة من قولة
صباح الخير
وهاشم أخوي
مابتشبه صباح الغير
تجي الكلمات من قلبك
تسالم في شغاف الروح
ماحسيتها من حلقوم.
كل صباح
بيتنفس صباح بانت
على صوتك
واحسك جوة في قلبي
واعيد كلماتك الطيبة
هاشم اخوي ود امي
واشكيلك عذاب عمري
تصبري فيني
وانتي الصابرة يانيلي
تمليني
كتير من أجمل الاوراد
وكم آيات من المصحف
وتوصيني
علي التسبيح
واضحك ليك
واغني معاكي يانايلة
( لسة الدنيا مازالت بخير)
صباح الخير
علي (دردق)
علي (بانت)
صباح الخير
وهسع وين هي يانايلة؟
اتلاشت صباح الخير
وانو الدنيا لازالت بخير
…
مسيخة الدنيا اصلو زمان
بعد فقدك
بقت امسخ
كمان وكمان
…
حتي الثورة يانايلة
ذي صابونة إتماصت
بقت بروة
راح هدرا
دم الصبيان.
…
ما أحزن صباح بانت
بدون صوتك
وما اتعس كمان الهاتف المحمول
واهي الدنيا
عدم وفصول.
…………………
يامحمد يامهند
ويامصعب.
أوصيكم :
بس ادوني من دولابها
فد طرحة
تعزيني
تصابحني
تمسيني
ادفن فيها نار حزني
واسمع من خيوطها الصوت
– صباح الخير
هاشم أخوي ود أمي
هاشم أخوي ود أمي
………………..
سلام (دردق)
العاشقاها (بت صديق)
يا جيرانها خمسة عقود
في الفرح والضيق
سلام ياصحبة الأوراد والأذكار
سلام يا صحبة التسبيح والقرآن
والترتيل
سلام لي كل ركن في الحي
سلام ياناس جزيرة الفيل.
…
سلام ياضريح
( لارنجة بت صديق)
(ترب) مدني
ماجاور (لحمد النيل)
…
سلام يا مدني
تربة ونيل.
…………………..
سويتلك عقد وقويشة
من انضر بلح قونديل
وساهرت ليل بي حالو
شان انسج من السعف اكليل
يليق بي راسك
المرفوع
ونصبتك
أميرتي عدييل
…
سريت يا نايلة
بين مساوي والحلفايا
ذاكرت الجذور وبكيت
وركيت في شراع مركب
قصاد بانت في عرض النيل
٢٠٢٠/١١/٥
التعليقات مغلقة.