د. احمد طيب استشاري جراحة الكلي والمسالك البولية يكتب.. (الحساب عدد لا بنت لا ولد)

97

 

تظاهرة بقايا نظام الإنقاذ ومن لف لفهم زكرتني قصة ايام النهب المسلح…
قالوا ( واحد كضااااب وجباااان و قليل أدب…. ماشي في الخلأ والدنيا ليل وضلام و شدة ما خايف براهو يغني في الجلالات….

ترم ترم تررررم
و صووونا قالوا لينا
الشرده عيب وشينه
والراجل الحمش
فوق الجمر بمش
وبخلي سمعه زييييينه

ترم ترم ترم

وكلما يشوف ليهو عود عُشر يرقد صوووف من الخلعة والخوف…
فجأة ظهروا ليه ناس النهب المسلح…
وان ما اخاف الكضب اقول جماعة حميدتي ديل زااااتهم…
و وقعوا فيهو جلد بالصوت:
__ طاااااااخ ترااااخ جيب العندك يا زول
__ رررب رررب رمي العندو ذي الفاتح عزالدين بس و داير يتفكفك.
___ ضربواهوا سوطين تلاتة قالوا ليه اقلع العمامه قلعها..
__ سوطين تلاتة اقلع الجلابية قلعها
سوطين تلاتة اقلع العراقي قلعو
_ سوطين و عكاز في الضهر اقلع السروال الطويل قلعو…
سوطين و شلووووت اقلع اللباس الداخلي قلعو…
خلوهو عريااان ميطييييي بس إلا لابس الطاقية الحمراء فوق رأسو وبقي ذي عوووود الكبريت قبل ما يولعوهو…
و سألوا حلتكم وين؟
قال ليهم ساعتين تلاتة من هنا..
قالوا ليهو يللا اتخارج و عمروا ليك الكلاشنكوف وقالوا ليهو والله من هنا لما تصل بلدكم تحك اضانك دي و للا تعمل حركة جاي وللا جااااي إلا نملاك رصاص….
و اوعك توقف الجلالات دي كمان
_ صاحبنا جاري جرية واحدة ما وقف إلا في الحلة و ميطي إلا من الطاقية الفي الرويس…
وشغال جلالات :
((الراجل الحمش
فوق الجمر بمش )))
ناس الحلة سالوهوا يا زول الحاصل شنو..
قال ليهم لاقوني ناس النهب المسلح..
وقالوا لي اقلع العمامة قلعتها
اقلع الجلابية قلعتها
اقلع العراقي قلعتو
اقلع السراويل قلعتهم

واحد سألوا قال ليه طيب ما قلعوك الطاقية لي شنو..
— قال ليهم والله اولاد الحراااام لو قالوا لي اقلع الطاقية دي كان وقعت معاهم دواااااس اما استشهدت انا وللا اقلبهم ليكم رمااااد…
يبدوا ان الذين يتباكون علي ضياع الشريعة بعد زوال الإنقاذ يتباكون فقط علي اسم الشريعة (( الطاقية التي لم تأخذها الإنقاذ من الشريعة )) خلال تلاتين عام..
__ تلاتين عام في وجود شريعة الانقاذ وليس شرع الله و لم يطبق حد سرقة و استبدل بالتحلل و الأئمة يبصمون وصفقون و يأكلون الدجاج في موائد السلطان حتي اذا أظهرتهم الكاميرات ادعوا مناصحة السلطان سرا..
__ تلاتين عام وطائرات الميج والانتنوف تحرق المسلمين في قري دار فور وجبال النوبة و النيل الأزرق و ثوار الشريعة يغازلون السلطة و السلطان و شجرة المؤتمر الوطني ترميهم بالظروف المكتنزة بأموال الشعب المجنبة والمختلسة ولا أحد يرفض أو يعترض…و لا تخرج مظاهراتهم إلا لموتي عزة و شهداء الروهنغا و قتلي البوسنه والهيرسك..
اسالكم بالله هل حرم الله والاسلام أكثر من إزهاق الارواح….وهل هناك شريعة أكثر من حرمة الدم..
__ تلاتين سنة وانتم تشاهدون اقتحام البيوت و جلد الحرائر ليس في حد الزنا ولكن لانهن قلن لا للظلم….و عندما سقطت الإنقاذ ظهرت غيرتكم علي الشريعة بين عشية وضحاها….
فهل سقطت الشريعة ام سقطت الامتيازات….
__ تلاتين سنة شهد الشعب فيها قصص يندي لها الجبين.. مدير ديوان الزكاة بسنار يقبض متلبسا و يدان بالجلد ولا يرجم بعد إقراره بالواقعة فهل خفي حد الرجم علي الأئمة ام كانوا في غيبوبة صحوا منها الان…
__ كيف حكم من قبض في نهار رمضان ببورتسودان و معه اثنين في وضع مخل للآداب في ظل شريعة الانقاذ التي تتباكون عليها…
__ كيف حوكم فضل محمد خير وهو يتحلل بمبلغ خمسين مليون دولار ..بالله عليكم كم تبقي معه من اموالنا التي استحلها بعد التحلل حسب شريعتكم التي كنتم تؤيدونها وبالتأكيد هي ليس شرع الله..

فالله عدل ويحب العدل ويكره الظلم..(( اني حرمت الظلم وجعلته بينكم محرما ))…
كم عدد الذين ظلموا باسم الصالح العام وانتم تشاهدون…
عن اي شريعة تحدثوننا و تتباكون…
هل تحدثوننا عن الطاقية التي تركتها لكم الإنقاذ حتي لا تعلنوا الدواس كما تزعمون…..
اقسم بالله ان عوام الشعب أكثر منكم دينا وإيمانا وتمسكا بشرع الله…
و اقسم بالله ان الإيمان الذي يتحلا به الشعب السوداني لو لم يكن راسخا لاعتنق دينا غير الاسلام في الثلاثين عام التي حكمت فيها الإنقاذ…..
لقد هاجروا ابناء الشعب السوداني خلالها الي بلاد الكفار هربا منكم وطمعا في العدل عندهم….و ما زادهم ذلك إلا ايمانا وتمسكا بوطنهم ودينهم..
لقد رأيتهم وهم يغرقون في قوارب الموت خوفا من جحيمكم وفقركم الذي استشري ليس لقلة الموارد ولكن لفساد الحكام و سفاهة القائمين علي الأمر و تبديد الثروات…
رأيتهم وهم يجلدون بالسياط في صحراء ليبيا و لا مغيث لهم .
ومع كل ضربة صوت يهتفون الله اكبر ….
__ رايتهم وهم يرعون الإبل في صحراء الربع الخالي و يزرعون صحراء نجد بعد أن أصبح مشروع الجزيرة خراب لا يسمن ولا يغني من جوع….
علي شرع الله تتباكون ام الي طاقية الانقاذ و إمتيازات المؤتمر الوطني تحنون….
لقد سقطت ورقة التوت والشعب الان يعرف شرع الله ويعرفكم كما تعرفون أبنائكم وانفسكم..

قالوا واحد سكرجي كل مرة يشرب العرقي وما بيعطي ست العرقي حقها….ذعلت منه وقالت ليه :
(( قروشي الطالباها ليك اخلصها منك يوم القيامة يوم الوقفة العظيمة قدام الله ))..
ضحك وقال ليها (( ان شايف الموضوع ده احسن ما تفتحيهو يوم القيامة ..
__ نحن شايفين موضوع الشريعة احسن ما تفتحوا ده لو اطبق ح تتورطوا…
والله ح تتعبوا جد جد مع شرع الله…
شرع الله ده مافيهو تحلل….
مافيهو باركوها…
مافيهو تمكين
مافيهو اخوان مسلمين و مؤتمر وطني و مؤتمر شعبي….
مافيهو ود الوزير و مراة الوزير و سكرتيرة الوزير و جكسي الوزير…
شرع الله واضح (( لو سرقت فاطمة بنت محمد لقطع محمد يدها ))…
نحن زاتنا دايرين شريعة ونطالب المجلس العسكري بتطبيق شرع الله في اي زول ارتكب جريمة من ١٩٨٩ لحدي اليوم……
نطالب بالقصاص في موتانا من ٨٩ و اموالنا المنهوبة…
نطالب بحكم الله في من اقتحم دار اي امرء مسلم….
((والدم قصاد الدم ما بنقبل الدية )).
الملفات موجودة والمراجع العام موجود وشرع الله موجود و القضاة العادلين موجودين علي قفا من يشيل ….
والحساب عدد لا بنت لا ولد

التعليقات مغلقة.