أمريكا طلعت دفار غاز ساااي

2


بابكر سلك

بسم الله الرحمن الرحيم
*الصفوف امام مراكز بيع الغاز تشكل ارتفاعا ملحوظا.
*شأنها شأن الدولار.
*يقولوا ليك قالوا الغاز الليلة بجي.
*تبدا الصفوف مع الركعة الاولي من الرقيبة.
*وفي مراكز أخرى قبل الوضو زاتو.
*وفي بعض المراكز بدون وضو.
*تجي ستة تلقي روحك نمرة تلتمية وحته.
*ولكن الامل لايموت.
*قالوا الغاز جاي.
*وبعد مقيلة اليوم كلو.
*وفي تمام الخامسة والنصف.
*يدخل اليأس النفوس.
*وتبدا بعض الانابيب في الدردقة خارج الصف.
*ويبدا السب والتف.
*وفجأة.
*نسمع ضجيجا.
*واصوات تتعالى.
*وغبار يغطي الانابيب واسيادها ومركز توزيع الغاز.
*الدفار جا.
*يابتاع التوسان ارجع لينا ورا خلي الدفار يخش.
*كل الصف مع بعض.
*يابتاع التوسان ماتطلع ياخ.
*في زول بقيف في حته زي دي.
*ويشموا ليك بتاع التوسان.
*بتاع التوسان زاتو يشم ليك التوسان.
*دفار شايل اربعمية انبوبة.
*جامبو ياعمك.
*كل الناس ضمنت انابيبها مليانة.
*وفجاة.
*واحد بتاع شمارات يسال السواق.
*جبتوا كم؟
*السواق يرد.
*تلتين انبوبة.
*صاحبنا يبحلق في السواق.
*ويخاطبه بلغة العيون.
*تلتين؟
*تلتين لييه؟
*وانا؟
*انا نمرة تلتمية وتلتين.
*ما اشيل يعني؟
*ما اشيل كيف وقاعد من ستة صباحا؟
*اسي الابنصات دي كلها في تلتين انبوبة؟
*الغبار الكندكنا ده في تلتين انبوبة؟
*يابتاع التوسان اطلع
*التوسان يطلع لي تلتين انبوبة؟
*الجخ ده كلو في تلتين انبوبة؟
*ايها الناس.
*دفار الغاز خذل الناس.
*اها.
*دفار الغاز ده بذكرني امريكا.
*مع اول كرونة اتضح انها جايبة تلتين انبوبة بس.
*كمامات مافيها.
*هبشة الكمامات.
*وضحت انو جخ امريكا طلع ديون فيفا سااااااي.
*اللهم.
*استرنا من الكورونا.
*ومن كضب المكرونة.
*واجعل بلدنا خالية من الديون.
*ونادينا خاليا من العيون.
*وما تفرتق ديمقراطيتنا ولا يحزنون.
*ايها الناس.
*اذا اقرب الاقربين ماسمع ببيع كاس السد الا بعد المؤتمر الصحفي زي حلاتنا.
*يبقي كلامنا صاح.
*ذلك العهد كان يفتقر للشفافية.
*لكن هل الامر ممكن يصل لدرجة اعضاء في مجلس بيع كاس السد يكونوا زي حلاتنا ماسمعوا بالبيع الا بعد المؤتمر الصحفي؟
*انا غايتو مابصدق يكون في اعضاء مجلس مجرد استشارة ما استشاروهم.
*ده ما ببقى عدم شفافية.
*ده ببقى أي مسمى تاني الا عدم شفافية.
*ايها الناس.
*إن تنصروا الله ينصركم.
*اها.
*نجي لي شمارات والي الخرتوم
*للمعلومية.
*المعلوماتية شغااااله في الكورونه دي.
*بحمد الله مشينا وانجزنا يا والينا.
سلك كهربا
ننساك كيف والكلب قال اطلاق سراح الجوة للكورونا وإدخال البرة برغم الكورونا اجراءات
والي لقاء
سلك

التعليقات مغلقة.

error: Content is protected !!