الأسبوع بقى فيه سبع (جمع)

4

 

# الحصة الصباحية /
الكيزان اعترضوا على (القومة للسودان).
الجماعة ديل هسع لو قالوا ليهم (قوموا) للغداء – زول بتلقوا فيهم قاعد مافي.
أحسن حاجة – خليك في البيت – سلامتك ..وسلامة أسرتك..ووطنك.
………………
· ناس زمان عندهم حاجة اسمها (الزمن الجميل).
· نحن كلنا عندنا حنين للزمن الماضي.
· الزمن القديم تلفون 3310 ما كان فيه – مع ذلك بيقعدوا يشكروا ليك فيه.
· هسع أبناء هذا الجيل الواحد لو كان ما عندو (تلفون) جلاكسي آخر صيحة.. ما بقدر يعيش.
· ولا بضوق للدنيا طعم.
· أهم حاجة عند أبناء هذا الزمن (التلفون).
· وبعد داك – كل شيء هين.
· أي حاجة تاني ما مشكلة.
· الحتة دي قاعدين نكتب فيها كتير – بنتكلم عن (كورة زمان) وبنقول العهد (الذهبي) للكرة السودانية.
· وعادي بناخد ستة في العهد الذهبي للكورة السودانية.
· زمان الهلال والمريخ – كل ما يلعبوا أمام اندية شمال إفريقيا بتغلبوا بالسبعات.
· ولا في زول بقول حاجة.
· وبقولوا ليك العهد الذهبي للكورة السودانية.
· المهم….(ما عاوز أدخل ليكم في التفاصيل).
· وأطول ليكم في الموضوع.
· بنتحدث عن (فن زمان) وبنقول العهد (الذهبي) للأغنية السودانية.
· ممكن دي نتفق فيها معاكم.
· زمن الكاشف وحسن عطية وعثمان حسين وإبراهيم عوض.
· مسرح زمان عندنا هو العهد الذهبي للمسرح السوداني.
· لو مسكت التلفزيون يعتبر جيل متوكل كمال وضوالبيت والفاتح الصباغ وإسحاق عثمان هو الجيل الذهبي للتلفزيون.
· على كل حال ليكم ولي غيركم اعملوا فيها ما سمعتوا حاجة.
· ما تشتغلوا بي كلامي دا.
· احفروا ليه قبلو.
· وادفنوه.
· في الصحافة – البحصل الآن – أي كلام.
· الجيل الذهبي للصحافة السودانية كان قبل (50) سنة.
· أي حاجة زمان بعتبروها (ذهبية).
· عشان كدا بقى عندنا مشكلة مع الحاضر.
· اعملوا شير.
· عندنا عقدة من المستقبل.
· أي زول خايف من بكرة.
· مربطين في الماضي.
· كنا بنتكلم بادهاش كبير عن ثورة اكتوبر 1964 وثورة ابريل 1985.
· كنا بنعتبر ما في ثورة احسن من كدا.
· بطولات.
· وتضحيات.
· جاء هذا الجيل – وقال لينا انتو بتقولوا في شنو؟.
· شفنا حاجات – في الخيال ما كنا بنتخيلها.
· حاجات فوق التصور.
· الجيل الحالي – وهذا الزمن – فيه حاجات عجيبة – حاجات غريبة.
· في أشياء يجب أن نفتخر بها.
· علينا أن نفتخر بأبناء هذا الجيل.
· ما نقعد نعملها كلها (تاريخ).
· وكرري.
· وهلال 87.
· ومريخ مانديلا.
· لا في حاجات الآن رائعة.
· هذا الجيل – جدير بالاحتفاء والتقدير.
· هذا الجيل يجب ان نقف عنده.
· يجب ان نفتخر به.
· جيل زي دا تاني ما بنلقاه.
· المهم….(ما عاوز ادخل ليكم في التفاصيل).
· وأطول ليكم في الموضوع.
· في جيل زمنو كلو ضيعو في القعّاد فوق اللستك…والوقوف تحت العمود.
· والغلاط طول اليوم.
· انا ما عارف كانوا بتغالطوا في شنو؟.
· والدنيا دي كلها كان فيها اتجاه واحد.
· أي زول عاوز يغترب.
· أي زول منتظر اللوتري.
· ما في حلم أكبر من (اللوتري).
· طبعا الكلام دا – كان بحصل قريب.
· على كل حال ليكم ولي غيركم اعملوا فيها ما سمعتوا حاجة.
· ما تشتغلوا بي كلامي دا.
· احفروا ليه قبلو.
· وادفنوه.
· في جيل عملها كلها (رحلات).
· والخميس والجمعة.
· الرحلة يوم الجمعة كانت موضوع.
· وفي جيل وقتو كلو في التلفون.
· وفي الواتساب.
· الجيل الحالي.
· للأمانة تضيّع وقتك في (الواتساب) أحسن من أن تضيّع وقتك فوق (اللستك).
· في جيل كان بعديها (شريك للقمري).
· الواحد فيهم اليوم كلو بقضي مطاردة في (القمري) وترصد ليه.
· وقت الزول يرجع آخر اليوم شايل ليه (قمرية) – بكون ما مصدق.
· زي كأنو جاب التمساح من بحرو.
· وفي جيل وقتو كلو كان في البحر.
· الواحد يرمي ليك (السنارة) وقت تمغرب يطلع ليه بي (سمكة) بيشعر انو عمل حاجة للبلد.
· كان في (فراغ) كبير.
· وكان في (وقت) مهدر.
· الناس ما عارفة تعمل شنو؟.
· حفلة (الخميس) القادم – تنتظره من يوم السبت.
· من يوم السبت وانت ما عندك حاجة غير حفلة يوم الخميس.
· اعملوا شير.
· الواحد كان لو مسافر بعد شهر – بكون بيجهز في (الشنطة) من قبل ثلاثة اسابيع.
· والبكاء والنحيب.
· والصور.
· والجوابات بعد ذلك.
· العالم كان مقطوع.
· لو سافرت 5 كيلو بس – اخبارك بتتقطع.
· كان ما في موضوع.
· ممكن تسافر من هنا لي كوستي وتقعد فيها أسبوعين ..عشان صاحبك عندو عرس اخوه.
· يا ريتو لو كان عرسو.
· عرس أخو صاحبك بتقعد فيه أسبوعين.
· هسع ما في كلام زي دا.
· الناس بقوا مشغولة.
· وأي زول بقى في رقبتو.
· ما في زول فاضي للكلام دا.
· وما في زول بيستحمل ليه زول 48 ساعة.
· الأوضاع بقت صعبة.
· عشان كدا – الناس (الكبيرة) بتقت تهرب من هذا الزمن.
· أي أب بقول لي أولادو كان بيجي الأول.
· اعملوا شير.
· وأي (جد) بقعد يتكلم مع أحفاده عن الزمن الفات.. ويقعد يشكر فيه.. وهو في الزمن السمح دا – القاعد يتكلم عنو دا كان عندو (جلابية) واحدة.
· الواحد فيهم يقول ليك الدنيا كانت بي خيرها.
· والشعيرية كانوا ما بشوفها إلّا في المناسبات.
· اعملوا شير.
· السكسكانية دي بتكون مرصرصة بس في (رفوف) الدكان – انا ما عارف كان بشيلها منو؟.
· الجبنة ما بعملوها في الفول – إلّا وقت الفطور يجيب ليه (ضيوف).
· وجماعتك بشكروا في الزمن الماضي.
· شيء سمنة.
· وشيء عسل نحل.
· وشيء لبن.
· كلام ساكت.
· واحد من الزمن القديم – زي حركات ناس زمان قعد يشكر ليّ في الزمن الفات.
· قال لي زمان كيلو الباسطة 5 كيلو.
· جوز الحمام معاه (ديك).
· رطل السكر كان بقعد شهر في البيت.
· دستة المنقا كرتونة.
· الاسبوع كان فيه جمعتين.
· زولكم من قال لي كدا – قلت ليه بس اقيف.
· انت وصلت تب.
· الأسبوع هسع بقى فيه سبع (جمع).
· الأسبوع كلو جمعة.
· نحن سمعنا بي الإجازة البدون مرتب.
· لكن اجازة بي مرتب دي ما سمعنا بيها إلّا مع (الكورونا) دا.
· الناس بقت ترجع البيت بدري.
· المواصلات كانت مضيعة زمنا ساكت.
· الحوامة.
· والمرقة بدون بدون مناسبة.
· الناس هسع عرفت قيمة (البيت).
· قيمة القيلولة.
· وشاي المغرب.
· وصينية الغداء.
· الناس دي كانوا جاريين في حاجات ولا بتستاهل.
· الواحد كان بنوم بعد الساعة اتنين صباحا.
· هسع الجدول انتظم.
· أي حاجة في مواعيدها.
· على كل حال ليكم ولي غيركم اعملوا فيها ما سمعتوا حاجة.
· ما تشتغلوا بي كلامي دا.
· احفروا ليه قبلو.
· وادفنوه.

التعليقات مغلقة.

error: Content is protected !!