الضو وجهجهة التساب

22

وداها فوق قوز الرماد
كان ظنو يوم يومين تلاتى…
الموية ترجع والبحر
يشرد شراد يصبح ترا …..
يبراهو بالسلوكة من ورا…
والعيوش والخير
يعم يرقد رقاد…
والناس تخم خم
السرور وماهو البرا…
ناساً كتار فاكرين كدي ….
يومين ثلاتى الموية
ترجع حالتها….
يبنى البيوت هو وشفعو
وأم الولاد يجتمعوا..
ويسترجعو الذكرى
وشتات السواد في صالتها…
سشيتاً ضحك …. وشيتاً بكى… يبقى الخراب دا رهاب رهاب… عبرة وحكاوي بتنحكى…
وبلدك …. متل كمين بلاد
بدت الدقون فيها الختا…
نجس تراها المترفين كترت مواعين الفساد كان
كلمة الإسلام غتا ….
جات ألت الله وشالتها
كان ظنو يوم يومين ثلاتى …. مشى السبوع والتاني جاء..
والموية كل ما ليك
تزيد ويقل رجاء …
قوز الرماد الكان قريب ….
فات بعيد بقى مابتخوج
قوز الرماد يالضو فضل
جزيرى ضارب فيها موج …
حصار …. حصار كيف النجا ؟؟؟؟ عاين البلد دي دمار ….
دمار اش الفضل ؟؟؟؟
لعبة قصب في ايدين طفل …. الحيطة وكتينا التقع
تقع ألف وجعة على الضلع…
دخانها يمرق في السمي ….
اهاتو تنزف في الأرض …
بحر الصبر والاحتمال
بيناتو ينقطع ترع …
لا يلقى يربط لا يحل…
لا حولة …يالكتب الكراريس المطفحى في الشتل…
التختة …. أقلام الرصاص
كتب المدارس كوم يلوج…
باب الفصل كاسح بي موج…
لا قوة يا ورق الجرايد …. يالمصاحف والصحيحات المجخسنة فى الزبل…
رافعين دواليبن بعيد …
طابلين خوازيقن طبل …
لا حولة حال مابتنقبل ….
ما بتنقبل ما بتنقبل…
يا مسلمين وين لي تساب
عشرة وتساب كم وأربعين…
دا يمين خراب كمين سنة …. يالضو منو الفى الكون
يصدق كان هنا…
ليلة ذكر …. حلقة مديح
دارة غنا …. هيصة ورقيص والقرمصيص سيرة عريس
وحلاة عروسو محننة ….
يالضو منو الفى الكون
يصدق كان هنا..
شفع بيلعبو جم بعض
ديك لفتم فى الدغشة
غبشة مشكنة …
والا الشتل خايف لها
فارد جرايدو وحاضنها…
بات الفريق بهجة متمسحى
وين يالضو نقاقير الهنا ….
وين مشاوير الفرح
غزل البنات الهودنة…
حش البراسيم العصر ….
الليل ونستو الشيطنة…
وعند الفجر كم ميضنة…
وحس التلاميذ الصباح
بى جنب رواكيب الحلب ….
حياته مبشتنة ……
الحلي كلها فى البحر ….
كسر البحر والا انتحر…
قلب المياه انكب قبلك
وحدك نفدت قوافل الأغنياء …. وجملك على الدنقيل برك …
مرتاح حمامن فى البروج ….
وأنت أب حماماً طاش يلوج …
ما سوى عش لا ركه رك
يالدنيا كيف متقلبنه ….
تصحي العصافير الوديعة
مع الصباح متخلقنة …
وشر الكلاب متمسكنة ….
كلب الجناين زيو
زى كل الكلاب…
كلب الغلابة المستغلين العباد
اليلى سيد ريس مهاب …
كلب أب زهانة …. تهينو هانة
من المهانة تقولو تك…
******
حكم انقلابات التساب
دوارة دنيا فرند قس …
نتجارى فيه سبق سبق…
نتلاوى عن فتح اللبق…
فاكرين برانا أهل العقاب ….
تارى البحر عوافى
عندو معانا حق…
يالدنيا زى سكرة
وتفك من راسو فك…
الدندهوبات زى بعض ….
شكل العديدى ورصها …
نفس العناقريب نفسها ….
عفشك دا حق غيرك تشك
يدخل فى بالك ألف شك
الحالة اصلاً من بعض ….
بعض المسافات اتلغت الفارغى طنبجها والملانى اتفرقت…
حكم انقلابات التساب
الحلي كلها حلتك ….
تنضم مع الفى أخر الفريق
من غير تفوتها محلتك ….
تحكى لو قصة تقصها ….
إن نفسو فيها تحسها ….
إن ماها فيها تحسها ….
حتى الأحاسيس نفسها
دكانك الغاية العرش
دولابك العفش الجديد …
الحافلة بيباب الحديد …
توليتك البيركس ايه ….
ايه خايف علي اكتر من الطين الوقع في الطين شهيد…
داك الفرش والعدى في
السحارة خت فوقها البرش…
ومن ضو وامش عارفين قليبك
طبعو حاروبيهمك الروح مو القرش..
لكن امش في الفيها
ما عندك خيار غير ما تمش …
إنسان معمر بالحياة
مابترمى نفسك يا حمش…
للتهلكة خلينا امش
وملس دحيشو …. الضو بكى … بكى ما بكى بكاهو حس
الطائرات بكاهو قدرتو تنتهي …. بكاهو يرجى المعجزات …
بكاهو يقنع بالرحيل…
بكاهو ما كان الشدر
ما الطير وما كان النخيل…
بكاهو كيفن في شبر
في الموية يصبح مستحيل …
بكاهو يلغط في البحر
والغيرو يشرب سلسبيل …
بكاهو البينضم في الغلط
يا قالو ملحد يا عميل …
بكاهو اهـ ماهو الإله
يادكة السلطة ودخانها و
شملتها وفى شرعت المحصول…
يموت إن زادت الموية
ويموت من قلتها كان سامحك.. في حقو سيدي العمدى هوى …. تب ما بتسامحك بت ابوى …
في شتلتها …. يا مسمى
محنتنا امتحان مرات قدر ….
حيناً غضب ناكر جبيهاتنا
وصلاة صلته يوم
يمحق الصاح الختا…
وين تمشى من غضب الغلابة …. اللا بكتلك نازلاتها
واللا اشتكتلك.. علتها …
لملم خرافاتك عليك ….
ما حرقتنا ضربة يديك …
دوخنا حقدك سلتها وينجينا ضربتنا بتصيب في حزتها ….
وفى حزتك يا بيتنا كب …..
يابيتنا كب …
ويا بيت أمير المؤمنين
أنت أتنكب …أنت أتنكب …
والضو شطب جهجهة اليمين
حجاً إلى أن امنين…
بين بدو البسملة وبين خط
خلاوى المكعوج واضح تخين …. بين دم وطين الضو كتب
فوق باب أمير المسلمين …
( ما ضر أبى لهب لو ظل بين المسلمين )…
لو جاء فينا لما ذهب يا مؤمنين بغير دين ….
ومضى أسمو بين قوسين
(( غضب ) ) ….
والموية اووووو كالظى رمت الدهاليز والارض…
بس فضل العظة الباب
والضو ضحك غنى وطرب …
في طوفو عند ساعةالعشى
ساعة وداعو بقت طرب ….
حس الصبار في الموية
والقعو والمعوز ….
طراهو للديك العجوز …
يالضو يجوز ينجى ويجوز… الصبرة كمير كوكو تتعشى
عشاها من ضو الصبرة
حرامية وشو في حبال
خازوقها اتلولو …
لا ترمى دموعك شوشو…
ترف استخبارتم أو صاج
الدبابة الكروو و خشب
الطيارة الفى الجو الترمى
قنابل بو … بو …..
كم يبنى بلادك يالضو
والضو بكى فورن وشى…
من شوقو واللا من التعب
غلبو المشى كل فردى
جارها من بلد….
يالضو سلامتك جيت متين ؟؟؟؟؟ سبتوها وحدها يالخزين…
سبتوها وحدها للدعت
سبتوها وحدها للبعوض للطير ودابى البحر ….نوني الضبابين …. الكلاب …الجندب …الفار …. السعر يالضو بلدنا ودعت راحت شتول…
دوب فرعت فاتت بيوت
ما ضاقت الزين والعديل…
ما اتمتعت …. ضاعت سعايات انسعت يالضو تليسو بالبساط…
أخر المطاف شملة كنيش
أتوسعت حلتنا غرقت من طرف…
حلتنا غرقت في شبر
غرقنا يالضو صح سرف…
العلمتنا العوم تغرق
هي ما تقدر تعوم يا للأسف ….
عز المصاب البركة يالضو
في الرقاب إلا لرقاب
اتجهجهت ما جاتها راحة
من كتر ما اتجهجهت…
ما دام معلقة في السراب..
صنت شوي ونهنهت
خايفالك يلهفك السراب..
يالضو يهقلنا السراب
والضو صنم ما جاب جواب ….
لا ذاتها هي استنت جواب …. امونة وين ؟؟؟؟مع العوين
في المدرسة أمك
منصحة حالها زين؟؟؟؟…
في المدرسة خالتي الزلال ؟؟
في المدرسة …. جدك حسين ؟؟… في المدرسة …. السكنة كيف ؟؟؟؟ في المدرسة …. العيشة كيف ؟؟؟؟ فى المدرسة …. تسال سؤال …. تسال سؤال يالضو تقول
تام لك سنه …. تسال تقول..
ماك من هنى شن السؤلات
ينفعو ما حال غلابة على غلابة… اتفرزعو فتحولن الغبش
القلوب قبل البيوت قسمو… القليلى مع بعض كم طمنون وشدعو لكن دوام الحال محال .. وعلى العموم ما مر يوم
ما جاب هموم هماً نقالا وتسمعو… وحدين يقولو خلاص
وحدين مصير يرجعو…
وان جيت بلدنا مطمنة
بس كيف يا أخونا بنامنا…
قبل البحر من هالفقر فقرا
ً ضعافنا مسمنا الفى العروق…
دا مو دمهم دمك يا آخى
ودمى أنا النار تقيد في الكان السبب يالضو بيوتنا يوقعو… ونهجر بلدنا نزح هنا
كان سلطة تتسلط عليها
وكان لجانا تلجنا …
وقشت وشى يالضو العرق
عصرت على طرف الطريق…
عقدت سفنجتها بي دلق …
وكل فردى كانت من بلد
ويشافن الاثنين خدر…
الليل ستر سرحت مع الخاتر
بعيد عكس العرق…
شيمة التهاويم شالتها
نحن وقدرنا قدر قدر..
نصبر صبر نصبر على البوخ الغريب نستحمل أصوات القعو… لامن نلاقى الهمبريب
والليل غناهو نولعو…
ويا يمة تفرحي من
طرف لما المسافرين يرجعو…
دا كان لا دمع انزرف لا
خيوت قلوب اتقطعو…
لاشتلة لا محصول تلف
لا ناس بيوتن وقعو….
صدفتنا تبقى من أخر ا
لصدف نمسك زمانا نطوعو… يختونا يمشو يودعو ….
فقراً علينا اتربعو
ديل لا …. بيخافو..
من الحساب لا
بيختشو ولابيشبعو..
حقاً نحرسو ولا بيجى
حقك تقاوى وتقلعو…
امسك شباطين الصراع والمابتلحقو فلعو ….
ثبت لي بالك لا يلين
انقح ترابك وازرعو….
عقبان ابو الإنسان
حنين ما شقه حنكاً ضيعو …
سرحت مع الخاطر بعيد ….
عكس العرق شيمة التهاويم
شالتها دقشت طرف قوز الرماد… انترتعت كانن عيونها يوقعن وقفت صحت بي حالتها
صدابها تيار البحر…
كان أقوى من بالو النزف…
وكان فرحة الناس الأسف… الهمبريب البوخ غنيوات القعو..
حنت بنيتاً جم حصيل
بت السرف…
جم كوم ولاد بيقطعو
فوق البحر فوق اللجان…
التانى الجات فوق الفرج والبشتنة الحالة كان دارت بحث الحالة ظاهرة وبينة …. السلطة
من غرق البلاد مسئولة هي …. وفوق عينا حقنا تدفعو ….
وبلدك حمايتها ممكنة ….
اصلو نحن لازمنا امتداد
قبال بيوتنا يوقعو…
كنا بنقولها وتلكنها ….
حيكومة دايرى تلجنا
تدينا مشروع نزرعو…
تدينا جيهتن نسكنا
لو وقفو الحرب الحرام
أل الله ذاتو هو لاعنا …
كان البلاد انطامنت ….
كان ألف خزان اتبنى
يكفينا ذلة ومسكنة ….
كانت زمان السرقى دس ….
الليلي وينك معلنة
وفرجاً قبيل بتشوفها عيب
عينك عيانى مقننة ….
وباسم الرصيف والما رصيف
كم بيت وصالون اتبنى…
كانت شعارتم وعود
صارت مجرد علقنة…
وبين الدقون والدلقنة …
كل التقول موساد
تقوم تلقاهو رب الفرعنة…
والجاى اعتى من
اللفات والضو تنى ….
عض اصبعو …. عضابو …
حس الطائرات عضابو قدرتو… تنتهي عضابو يرجى
المعجزات عضابو ….
صبرو وطول رجا…
وى ابوى جا وى
يالقميرة ابونا جا…
وجرو كالفراشات شفعو…
جرو منو غادي وفلعو…
أدو البحر …. أدو الحجار …
. وكن الحصى نقول يجدعو …. براق عيونن يلسعو
تال القميرة يصنقعو….
يا طالع الشدرة جيب لي
معاك خيمة تستر من المطرة…
لو كبت الغيمة جيب لي معاك قمحات قمحاتنا في الشيمة…. وغنم الحلب رايحات
ضلمنا ضليمة خيمة السعودية… دفو مابتدفيكا ولبن اليهودية….
بلدك ينسيكا قمحاً من أمريكا… خازوق ركب فيكا…
غير خير بواديكا
مافى اليكفيكا …
يا طالع الشدرة من
خيمتك…… التوبة …..
جيب لي فروع خدرة
أو جافة يا دوبا…
في الحرة في المطرة
في عز برد طوبة …
نمرق من الوكرة ….
تبقالنا راكوبة …
يا طالع الشدرة قبل على الحلة … قول ليها يوم بكرة كربتنا تتحلا… ننزل نضويك ضرعاتنا ما دلا… قادرين نسويك وعقبان على الله.. يا طالع الشدرة طولنا يا والله
ننزل هيا ويلا …. أندلى نندلى …. نندلى حلتنا .حلتنا مادلا.. نندلى.. ما دام الأسف والجهجهات
مابينفع ثبت يقينك يا ولد…
الناس مصيرن يرجعو…
أنت وأنا نار السعف
كان ولعت بيناتنا ما
تستهونا الجو شرارة تولعو…
ما شال عزيمتنا والبندق
المربوط مافى اى ريح بتفرزعو… الزول بحن …. حن يا ولد
…. حناً يقدمك اتبعو…
تش عين رجال الضلام
قبال يمدلك اصبعو ….
حن يا ولد … حن يا ولد ….
حن ياولد والضو يقالد
من طرف ناس البلد
قبال يقالدو يدمعو….
مع السواد النزرف و
الدموع بيهو يرجعو….
في عمة في بت في
ولد شم البلد ناضم قبيلتو …
ونسها هبهب دموعو
يبسا نقناق حبيبين
القسا طراهو….
حس الطائرات والضو
نسى قوز الرماد الفيهو
فوق قوز الأسى…
الفى المدرسة شفنا ايش
وما شفنا شىء ….
معزاتنا كدن للحصى
شفعنا كم باتو القوى…
ووجع بطون درن العيون …… الهلوسة …. موية الغنم ….
والدود وموية الناس سوى…. الادبخانات الخلا الناس تقير
في الكان سبب ما
تلقى عافية ولا دوا …
ما تلقى غير النسنسة
وكاويق كلام شالو الهوى…
حال ماها حال غلو البضاعة العندو سلعي عرف لها …
غلو القمح … غلو اللحم ….
غلو الخدار … غلو الملح ….
دسو اللبن دسو العدس
والصلصة دسو الأسبرين ….
دسو المعايش كلها
حيكومة وين ؟؟؟؟؟
اللجنة وين ؟؟؟؟؟
هي عديلي راكزى محملة ؟؟؟؟ المصيبة الجامدى شن بيحلها…
حال ماها حال صدمتنا…
تبقى على العدو وقعتنا …
تبقى على الجبال
قدر الله يا بت الحلال …
وغلو البضائع جلها ؟؟؟؟
يالعشى …. الرجال ..
اللابتخاف الله وتتوب
لاتختشى لجنة غرقت البلد…. ارجع اجيك بي ياتو وش غلو البضاعة الفى ايدو مفتاح البضاعة الارزقى المايص عرقنا ومتحشى… وما ضره غير أبان دقون
فيها الضلالة معشعشى…
وفقراً تغش في الله تخش
بيتو وتسرقو وراء العشى….
كم من ضمير ناس ما
القدر تجلب بلاده وترتشي…
وكر من عوارضك يابلدنا
الناس تشوفها مدعمشى….
تسمع سماع ومطنشى
وحاكمانا في شنو وشان شنو حيكومة ما خبرانا شى….
يا امونة تب شن الشكى
حس امة المهدية هم يجى ….
من بعيد يجى منتكى….
ما حاقو فى الطين الرخص ينحاسدو فى ارض مكركى … حرمان عليكى تقولى لا ؟
مجبورة يا خادم الفكى …..
مجبورة انتى على الصلاة
لا تازى جرحو تحكحكى….
وجايك ملكلك من تحت
يا امونة تانى تلكلكى….
شيلى الحرف داك رشرشى
قوم يا عشاى …. قوم للعشى …. قوموانتكى وقام وانتكى ويلقى الحسن فى صفحتو وقدام وشى… انجيت بلدنا اتكسرت
اى يا الحسن كسرها البحر ؟؟؟؟ اى يا الحسن الزول بكسر بلدو ؟؟؟؟؟ والضو سكت ….
طقطق اصابع ولدو انقلس …
فس …انقلس ….فس …انقلس..
يابا المدارس اتدمرت ….
صاح والجوامع اتكسرت ؟؟؟؟
اى يا الحسن يابا الجوامع
هيل منو ؟؟؟؟ هيل الله
حتى المدارس حقتو ؟؟؟؟؟؟
لا لا المدارس حقت الحيكومة
الزول يكسر حقو كيف ؟؟؟؟ والضو يطلوحبو اندهاش
لا يلقى قيف لا بانلو بر ….
وامونة صوتها من بعيد …
نوم يا قشر صح يابا فى
الجامع جاء تمساح وانبطح ؟؟؟؟ اى يا الحسن يابا التماسيح… مسلمين ؟؟؟؟ لا مجرمين … لابسين دقون شايلين سبح…
ما تضربوهم بالسلاح…
وتكتلوهم تاح ترح…
والضو سرح….
وامونة صوتها من البعيد
حلقها انجرح ….
نوم يا قشر …. نوم قبل اجيك…
يابا البحر دا ولد منو
؟؟؟؟ ود المطر …
ويابا المطر بت السحاب ؟؟؟؟ ويابا السحاب خير للبشر ؟؟؟؟ ويابا البشر هول ربنا ؟؟؟؟
وامونة تجرى من البعيد تقطع كلامو وتنحسو تجبد اضانو وتقرصو لا تقلدو ….
جيب القشر دا على
رفاقتو نرقدو ….
امونة غزته تمغسو…
أنا دار أنوم في صدر ابوى
شان البحر وقام انحشر..
في صدر ابوهو وحدثو …
في مرة جونا رجال كبار …كبار …. غمتو في ايدى قروش كتار..كتار…
امونة شالتها فنتها الراجل
أب دقنناً كبيرى سبه دنقر لقطا …
أنا قم بكيت امونة فكت صرتها… ادتنى صندوق بسكويت
وبعدين سكت …
وامونة قامت شو بكت…
ولفحت نعاله وتفلعو ….
نوم يا قشرنوم قبل اجيك
أنا دار أنوم في صدر ابوى…
شان البحر ونام الحسن
في أخر المساء…
وصنت عيون النوم
يجيها بعد تعب …
ثرثار وداخل المدرسة
والضو صحى بى صياح الأمهات واطفاله منطلقين بكى….
بكاهو حس الطائرات
والضو ضحك لما البنات
قالتلو طقها بى حجر …
يالضو تطقها بى حجر
في الجو بترميلنا الخيام …
ياقطرة التركوما …. بالسكر …. دقيق ومعلبات منام منام…
جات البلد تعتب جراحها
مسببات لون القمح طعم التمر …. ريحة الطلح ضل الرواكيب القدام.. البرتكان والمنقة والليمون
يجوها منام منام….
المشرع البنطون معدى ودوشة العمال تجيهو منام منام ….
طوريتو في أطن الكونشبر مركوزة تال الساب يجوها منام…. منام الروضة والأطفال بنات الابتدائي .. العام يجوهو منام…. منام الصفقة والطمبور وزناً عام يجوهو منام منام….
الناس تقاوم فى البحر ….
مريوقة متماسكين تمام….
في القيف يجوهو منام منام….
الارزقى …. أرباب البنوك
…. وسلة حرامية الضلام….
الملمس السادة الكرام …
واقفبن عليهم زى غفر
قاشرين يجوهو طمام طمام.. السوق غلاها ….. الشفع الايتام… يجوهو ديوش
ديوش وبلا قروش…
اللجنة تجار الرصيف المسخرة الهدام يجوهو كروش كروش.. والضو يدوش …
أصبح صباحك ياالبلد …
يبرد صباحك يا البلد
والضو يعافر في الحبل …
الضو حمارتك طفحت…
أمس الكلاب بعجنها
كلبة مديني وديك عماد
ودحشك معاهو دحيش غريب …. خلينا فوق قوز الرماد ….
ادينا عيش وصبيط تمر ….
يبقالو أسبوع يعيش
كان الله راد ..
والضو هتف أنا بكرة صاد ….
كان الله لراد….
والضو خنس قنب حكى ….
حكى بى مغس حكى للولاد…
قصة تساب كم وأربعين
كيف جدو فات الدنيا
فات فاكر الإنجليز
ضربو البحر بالطائرات…
شان يشرق المشروع
يموت والأمة تتشتت شتات… قال وانتكى الإنجليز اذنابها
في وكم وأربعين موياتها جات … والضو بكى بكى ما بكى
بكاهو حس الطائرات ….
بكاهو قدرتو تنتهي
بكاهو يرجى المعجزات…

#لحظةشهيق

التعليقات مغلقة.

error: Content is protected !!