المبدع كدكي يرد على السؤال الصعب: يا جدو زمنكم كان فى شيبس؟؟

4

الشاعر محمد جيب الله كدكي
يرد على حفيده عندما سأله:
“يا جدو زمنكم كان فى شيبس؟؟”

جدك مابياكل شبس
جدك اكل طفولتو هرود
جدك كان زمان قرقاشو
قرقاش كسري مرة تمود
جدك عاش زمان الدوكي
ليها مفجفج الواقود
جدك جيلو كد الدوم
زمن الدوم حلو ومريود
جدك ماهو ناكر انو
قروي وفوق برش مولود
جدك ملتزم بالبيئة
من زمن القرش مقدود
جدك زول بليلة لوبي
عندو ورودها احلى ورود
جدك بالعراقى البلدى
في السيل بى شبكتو يخود
جيبك انت مليان بلى
وجيب جدك سعف معقود
جدك بالو وارثو وراثي
من حبل الغسيل ممدود
جدك ماهو زيك لا لا
فى العيد ماضرب بارود
جدك كان يقلب الهوبة
لما (العز) تجيبلو عتود
جدك عيدو يدفن شركو
فى الكبريتى شايل الدود
جدك فى البحر عكران
جنو وحاتك انت برود
جدك قضى ايام سمحى
فى طلقيت وخيل وكعود
جدك كتفو حيلو اتهد
من شيل الصفايح ام عود
جدك كان يكب الرملة
وكت يبقى الصفيح مقدود
جدك ياما فتل اشميق
وداوى جروحو بالهبود
جدك كان زمن مدرستو
الخرتاي ليها لكود
جدك قام جنا تربال
كافح وكم بذل مجهود
جدك صارع الطورية
ومنجلو فى الحصاد مشهود
جدك بالملح والشطة
زولاً قضى زمنو صمود
جدك من قصب طنبورو
لا سلكاي لافى جلود
جدك فى جوامع الحلي
ما زاعوهو يوم مفقود
جدك كان يطوطح الباب
زمن مابتلقى باب مسدود
جدك زمنو كلو يزازي
حمارتو جريدي كانت كود
جدك ما دخل فى روضة
كان زول خلوى جيدة بلود
جدك يجرى شايل النبلة
يجرى من عمود لى عمود
جدك ما اشترى اللعبات
وما خسرلو فيها نقود
جدك ما قعد زول خملة
شان مصنع عليهو يجود
جدك كان بيصنع لوري
من الطين حصان وقعود
جدك من بلاستيك عم
وما شاف فى صغرتو قرود
جدك اهلو كانو على الله
وكل مرض وليهو حدود
جدك زمنو تطعيم مافى
علاجو لبن من الكدكود
جدك امانى شم قرض
من المجميج زمن مورود
جدك فى زمانو الماضي
لافي تمرجي لافي حسود
جدك باقى كاتلو الحن
ويحن كل ما يشوفلو فصود
جدك من صغير تب
بى صلة الرحم مشدود
جدك شعرو كلو القالو
من أجل المحنة تسود
جدك غايتو عدى ايامو
بي فضل الغنى المحمود
جدك بينى بينك زمنو
مافى وولى مابيعود
جدك لسه فيهو رويحى
وان كان العمر محدود

التعليقات مغلقة.

error: Content is protected !!