باع المكنة وقال لي دور

0 0

في السلك

بابكر سلك

*ايها الناس
*نعيش ظروفا لاتتخيلها اسوأ الظروف ذاتها
*ارتفاع جنوني للاسعار والضغط والسكري
*فلس للطيش
*كلو شئ يرتفع الا قيمة الجنيه *الجنيه في النازل كلو ثانية
*والثورة المضادة تشتغل في مواقع التواصل والاعلام لتضخيم الوضع الذي لايحتاج لتضخيم
*ويسألون بل يتساءلون
*الوضع ده لمتين؟
*الفرج بجينا متين؟
*فشلت حكومة الثورة
*وهاهو المواطن يسحق في اليوم الف مرة
*مالكم ماوديتوها قدام؟
*هكذا يتساءلون بكل بجاحة
*وعاملين رايحين
*ياخي اخجل
*ماسك العربية مية سنة
*كسرتها ودشدشتها وهديت المساعدات وبعت المكنة والجربوكس ولحست اللساتك وكسرت القزاز
*وتقول لي دور!
*الكبوت مقفول
*فتحناهوا
*لقيناك لحست البطارية وبعت المكنة
*وده آخر شئ كنا نتوقعوا
*ماتقول لي دور
*وماتستعجل تحرك العربية
*خليني اعيد ترتيبها
*واجيب ليها اللفحتو انت منها
*واكمل صيانتها
*وحينها
*صدقني قلبة مفتاح حاتدور
*وحاتمشي لي قدام
*حاتعوض الزمن الفاتها لما كنت انت ماسك المفتاح
*تبيع حتي العفريتة؟
*الله لاغز فيك بركة
*ايها الناس
*اكتب ولازال الكابتن مجدي عبداللطيف بغرفة العمليات تصحبه الدعوات الصالحات
*ولاينقطع صالح الدعاء عن كل ضحايا الفندق
*ولعلها عترة تصلح مشينا وتجعل منا شعب يتمسك بكافة وسائل السلامة
*نحنا مستهترين
*وكأن ارواحنا لا تعنينا
*شوف الشارع
*منتهي الاستهتار
*ركشة تطلع من شارع فرعي تدخل جيبك
*حافلة تقيف تنزل زول في حتة لستك مابنزل فيها
*قندران يغازل آكسنت مضلعة جوة الكبري
*وموتر ماشي تقول دبابة
*طاخ طاخ طاخ
*وراكبين فيهو تلاتة
*وخاشين بيهو بين مورننج وفستو حقارة بس
*نحنا بنستهتر بارواحنا
*وللاسف بنضيع معانا ارواح ابرياء
*الغريبة الدرداقة الفيها مكنة
*ديل معظمهم بمشوا ساااااكت علي الله
*كان اخير الكارو
*علي الاقل الحمار بتصرف
*المهم
*عجبني كلام لافي في الميديا
*بقول
*الصينيين اي حيوان يقابلهم بياكلوهوا
*والهنود اي حيوان يقابلهم بعبدوهوا
*والعرب اي حيوان يقابلهم بنتخبوهوا
*ان شاء الله الصينيين مايقابلونا
*ايها الناس
*امس رحل عن دنيا المريخ زول جميل
*زول جميل شديد
*وصحابي في درجة ايمانه بالمريخ
*رحل عنا والمريخ والمريخاب في امس الحوجه له ولحكمته ولمحبته الكبيرة
*رحل حاج القاضي
*من مؤسسي ملتقي الصفوة العالمي
*رحل ولكنه ترك بيننا الحب العميق لكيان مقدس
*وترك لنا محبة الناس له
*الف رحمة تنزل عليه
*ايها الناس
*تخيلوا الحراك ده ماحصل
*وماحدث ماحدث
*والكرونا وصلت ايران والكويت والامارات
*تتخيلوا الجماعة ديك كانوا برفضوا فكرة تحويل المصابين للسودان مقابل اجر زهيد؟
*بعملوها
*ديل باعوا جنسيات الوطن
*مايؤجروهوا كرنتينة!

*ايها الناس
*ان تنصروا الله ينصركم
*اها
*نجي لي شمارات والي الخرتوم
*حاتدور يا والينا
*صدقني حاتدور
*ونبدأ مشوار المليون ميل
سلك كهربا
ننساك كيف والكلب قال وسرقوا عجل الحديد وشنقلوها لينا في حجر
والي لقاء
سلك

اترك رد