بلد العناوين والنشيد

5

يا العيونِك زادوا نَهْرَنا ضفتين,,
جينا ليك من وين ووين ..
وانتي في صالون سحاب
فاتحة في السما ضلفتين .
يا الجفونك زارعة حُلْم
تِحِتْ مخدۃْ صَابِريِنْ ..
وساقيه نَبْتَها بي سواقي عَرَق جبين
القواديس دايرۃ راوية
والفوانيس تلفح الضو
من بسيمۃ طفلة تتمرجح
علي النيمة وتردد غنوۃ
الفرح الحزين…:-
(يا شماسي يا شماسي
فكي قيد الضُل وحاتك
من وِتِد جور الاماسي
وجيبي لينا بُشارۃ خضرا
و لَحْنْ قوقاي القماري
علي سما سلم خماسي..)
….
يا الموانيك راجية جيتك
قِبْل تحليق النوارس
يا الاّغانيك قاصّه دربِك
مرۃ باين ومرۃ غاطس
ما بْتَغُشِك سكة في صحرا الهواجس
وما بِتثنيك من عبورك
كلمة مملوخة ضُراع
لا هجير لا بَرْد قارس
ولا نَفَسْ غَضباً يزمجر
في حلوق الظالمين ..
يا السؤالي سبق سؤالك
يوم خيالي قلع خيالك
من عيون سراً دفين
يوم وقفتَ سالتَ بُحتَ
ويوم ندهتِك من ورا سور الضواري
وخلفي كان جيش الصدي
وامامي نَهرِكْ بي ضفافو الاربعة
من فوقي دايرۃ من الغيوم
والريح عيونا مُربَعۃ
ناديتَ بي مايِكْ اُفُق
وصرختَ:
وييينك. انتي ويييين..!!

*مكاشفي2015

التعليقات مغلقة.

error: Content is protected !!