عم عبدالرحيم وِلد يا سهير

4

بابكر سلك
*الرائعة الحبيبة القوية الأستاذة سهير عبدالرحيم.
*كعادتها تناولت موضوع في غاية الأهمية.
*كتبت عن برنامج رامز وانتقدت حديثه عن مصر الممتدة من الاسكندرية وحتي حلايب وشلاتين.
*طبعا الشغل شغل مخابرات مصرية بالتعاون مع منتج البرنامج والقناة صاحبة منصة البث.
*ولاغرابة فيهم التلاتة.
*لأن ثلاثتهم يعني لهم تمدد السودان وتقدمه خسائر فادحة.
*ويكفي ما وصلنا من قصص تهريب الذهب ابان العهد البائد وكشف المستفيد الاول من ذلك.
*ايها الناس.
*ما تناولته الأستاذة سهير كان يجب علي وزارة خارجيتنا اتباعه وبشدة وبصورة رسمية.
*فاذكر قبل سنوات عرض آدم شو ببرنامجه الكريه تريقة على السودان في ما يخص حلايب مخجلة.
*وقال بالحرف الواحد ان السودان باعت نصها التحتاني (يقصد فصل الجنوب).
*وكلام فارغ كتير.
*رديت عليهو في عمودي المتواضع.
*ومسحت بيهو وبمصر الارض.
*الزمن داك كنت بكتب في الهدف.
*صدر العمود.
*وفي نفس اليوم تسعة صباحا ناس الامن كانوا مع الاخ ميرغني كرار مدير الصحيفة بمقر الصحيفة مستنكرين العمود
*اخبرني ميرغني وحضرت
*هاجوا وماجوا
*وقالوا السفير المصري احتج علي العمود لدي وزارة الخارجية
*تخيلوا العمود طلع تمنية صباحا السفير المصري قراهو
*الساعة تسعة كان احتج وبلغ الخارجية التي ابلغت الامن الذي حضر للصحيفة للتوبيخ
*قلت ليهم كلامي رد علي آدم الانتو سكتوا علي تريقتو علي السودان.
*قالوا أبدا ما سكتوا.
*سفيرنا في مصر ابلغ الخارجية المصرية محتجا.
*والخارجية المصرية اعتذرت وقالت دي حالة فردية
*قلت ليكم برضو خارجيتنا تقول للسفير المصري سلك ده ما رئيس الجمهورية.
*سلك ده حاله فردية.
*لكن بصراحة الحرقهم شديد كلامي القلت فيهو.
*مصر بتتكلم عن النص التحتاني يا آدم؟
*ونحن بنشوف عقالات داخلة مصر بآلاف الدولارات وخارجة مقشطة.
*والغريبة ما شايلة معاها أي حاجة اشترتها من مصر
*وين راحت آلاف الدولارات يا آدم؟
*عفارم عليك أختي سهير.
*وعلي الطلاق عم عبدالرحيم وِلِد.
*المهم.
*كلام يدور حول قفل استاد المريخ موسم كامل.
*الموسم ده بدأ بمباريات افريقية وعربية ثم الدوري.
*قابلنا شبيبة القبائل والوداد باستادنا.
*واستمرينا في الدوري حتي جاءت مباراة الهلال.
*الاستاد وقتها كان جاهز.
*ولكن اللاعبين اقترحوا تحويلها للخرطوم لامور نفسية تتعلق بالزناطير.
*وبعدها تقرر قفل الاستاد للصيانة.
*لعبنا دوريا بالخرطوم ضد الهلال وهلال الفاشر ومروي والنمور وشرطة القضارف.
*الخمسة مباريات ديل بمثلن موسم كامل؟
*غايتو المابتدورو في الضلام تحدر ليهو.
*والمجهودات التي يقوم بها الاخ البصري بالاستاد مدهشة.
*يكفي انه حل مشكلة الخور اللافي تحت السياج وجايب لينا كلام الكاف والاتحاد العربي.
*يكفي انو غير السياج الكان غير مطابق للمواصفات.
*بآخر جيد ومتين وجميل.
*ويجري العمل في الملعب.
*فلماذا نحارب من يبدع؟
*بالمناسبة.
*البصري تم تعيينه زمن جمال مديرا للنادي.
*معلومة قد تخفف النقد عليه.
*لان معظم من ينتقد ينطلق من منصة المع والضد.
*وازيدكم من الشعر بيت.
*بوكلين المريخ حفر للبصري.
*ولكن جمال انصفه.
*ثم بعد ذلك وبعد نجاحات البصري بالنادي حوله هذا المجلس لادارة الاستاد.
*شكرا بصري.
*وما عليك.
*المهم.
*جمع التوقيعات لسحب الثقة عمل محترم.
*لانه قانوني وديمقراطي.
*ولانه يعبر عن قناعة القائمون عليه والمستجيبون له بالديمقراطية التي انكرها معظمهم ردحا من الزمن
*بس السؤال.
*هذا العمل يتم وفقا لياتو نظام اساسي؟
*هل صيغت الوقائع التي تمثل اسبابا كافيه لسحب الثقة.
*ام الاعتماد علي عبارات فشلة وباعوا المولد والمدرب ماعندو غاز؟
*الخطوة جميلة وتعبر عن سيادة الجمعية العمومية التي نادينا بها كثيرا وحاربنا لاجلها اصحاب القناعة بان السيادة لامانة الشباب والمفوض والوزير وعبدالرحيم محمد حسين.
*هي هجمة شرسة في الدقيقة تسعين.
*ولو لم تكن منظمة.
*واندفعنا للهجوم.
*وانقطعت.
*تبقي هجمة مرتدة ودفاعاتنا خلا بسبب الاندفاع.
*شكرا شعب المريخ الديمقراطي.
*وشكرا الديمقراطية التي خرجت من نادينا للشارع.
*ايها الناس.
*إن تنصروا الله ينصركم.
*اها.
*نجي لي شمارات والي الخرتوم.
*كان شفت يا والينا.
*عندنا صاحبا لينا.
*مرتو معلمة يا والينا.
*قاداهو ليك مرتبي بقي خمسطاشر يا اخينا.
*مرتبي بقي خمسطاشر يا اخينا.
*لما زهج يا والينا.
*قال ليها مرتبك كان تلاته يا حسينة.
*في ميتين ركشة ماشي وجاي بكمل يا حنينا.
*اسي الركشة ماشي وجاي بي خمسمية في الشهر تكمل الخمسطاشر وتقعدي ساي ياحسينا.
*وكأننا يا ابا زيد ماغزينا.
سلك كهربا
ننساك كيف والكلب قال كورونا تحسبو لعب!!!!!
وإلى لقاء
سلك

التعليقات مغلقة.

error: Content is protected !!