قصيدة الطَوَاطِمْ

13

علي تولي

الطَوَاطِمْ

مسؤول من الخير
والنِضِم..
والمِدَادَ الفِي الجَرَايِد
طالَمَا…
إِنْدَقَّ دُفَّ الفَرَحَة
للدُّبَّ الكَبِير..!!
الكَانْ بِيَتْسَربَقْ لَيالِي الهَجْعَة
للكَهَنَة ويِبَخِّر بِالمَجَامِر
كلَّ تلْكَ الأَديِرَة.
لمْتِين ولَا…..
بِتْوَنِّسَ النَّاسَ الرَّوَادِي..!
لمْتينْ وُكُلَّ يُومْ طَالْعَة
جَد بِالفَارْغَة أرْتَال الجَرَايد
وَالشَّاشَّة مَا بِتْجِيبْ
بَرَا البِتَّ المِمِسِّحَة مُخَّهَا..!
وُجِيْهَا مِتْكَنْدِكْ غُبَار..!!
شَاشَةً بَلا بَيُّوضَةْ شِنْ تَشْبَه..!
أقِيْفْ..،
في حرَّها..
والدنيا صيف..

****** *****
وُرِّيْنَا يَا سِيدَ النَّضِمْ..!!
رَاحَت مَعَالْمَ الشُّوف..،
وُانْبَهَمَتْ عَوَالِم..
والحَقَائِقْ مِنْ وَرَا حِيَطَ العَوِيْلْ
مَكْتُولْ أبُوهَا وُمَيْتَة بِالغُبُن أُمَّهَا
وَالشَّاشَة غَاشِيْهَا الْغَبَشْ..
مَمْسُوحَة أفْلَامَ المَظَالِم
والكل مَعَاكْ يَا سِيدنا عَالِم..
يا مْقَالِد أَسْيَادَ المَظَالِمْ..!!
نسَفُوا الحَقَائِقْ كُلَّها..!
مَنْكُورَة يَا الشِّيْنَة التَّنَشِّف دَمَّهَا

******** *******
ورينا ما الأمر انبهم
مَسْؤُولْ مِنَ الخير وَالنَّضِمْ..!!
وُرِيَالَةَ القَلَمَ البِسِيلْ فُوقَ الجَرَايِد..
لِمِتِينْ وَلا طَلَانَا مِنْ تَالَا المُذِيْعِيْنَ الرِّضَا…!!
باقيات علينا اتنين سوا
طَنِينَ الرَّادِي وَالنَامُوس..
يا سيدنا وعُيُونَكْ تَعَايِنْ،
وحالنا متكول للخلا..
وفراشنا من برش القيادة الما انطوا
كاتلنا حر شوق الحقائق..
والخونة ضاربين الهوا

****** ******
أسمعنا يا سيد النضم
نِحنَا مَا بِتْعَالَى بيْنَاتْنَا الظَّلَمْنَا
نِحنَ نَاسْ بِنْحِبْ غَنَمْنَا..
إِلَّا البِيشَبَهُو بِي دقِينَاتُمْ تُيُوسْ..
كُلَّ الدَّبَالِيْسَ العَتَارِيْسَ النِّجُوسْ
لُصُوصَ الْغَفْلَةْ لَهَّاطَّةَ الفُلُوسْ..
مَا بينْ عَمَارَاتاً شَوَاهِقْ
وُفِيلَّا فِي شيْلْةَ العَرُوسْ..
حَكَمَتْنَا أسْرَابَ الكَوَاسِرْ..
نَهَبَتْنَا قِطْعَانَ الوُحُوشْ.!
رمماً كروش..

**** ****
ورينا يا سيد النضم..!!
ما زَالْ لِسَانْ حَالُمْ بِجَاضِمْ..!
ورِّيْنَا بَسْ لِمْتِينْ تَهَادِنْ..!
وُمَا انْكَسَر قَلَمَ المَظَالِمْ..!
نفس غلمان الخليفة
والأناقيب الرقيبة..
نفس غيلانُمْ تبَحِّت
والمَنَاتِيفَ الطَّوَاطِمْ.
ورينا لا متين ات تهادن
والطناش الفي السيادة
ورينا بس لمتين بتتساهل
تجامل..!!

ورينا ان كنت بتساوم..
ونسيتا أوجاع القيادة
ما كنت بيناتنا بتصادم..
ونحنا بنواجه الإبادة
ورينا يا سيد النضم

علي تولي
yuotl2468@gmail.com

التعليقات مغلقة.

error: Content is protected !!