ملحمة القيادة العامة

16

يوم جرد الحساب بالورقة
حاسب نفسك اللوامة
حاسب والمتاريس درقة
والشدر البيمشي يمامة
عينو علي الرغيف والطرقة
وإنت علي المعاك يتامى بينك والمشارع فرقة
والبحر الكبير دوامة
قول لي حسين هناك في الشرفة
حمد لله الوصلنا سلامة
زي يوم الوقوف في عرفة
والناس الهناك أياما
شاهرين الهتاف سلمية
رافعين الأيادي علامة ✌
إتنين بالكتير في المية
والباقي بنتمو شهامة
لو تصبر علينا شوية
والصبر إن كمل نتسامى فوق كل الجراح الحية
والنار التزكي ضراما ما بتعرف كلمة أحيا
والنضم الوراهو ملامة
والعمر البروح عيدية
هدر في مسخرة دعامة
ما بنقبل فداه الدية
ما بناخد قصادو غرامة
نحن على الفداء إتواعدنا
وإتعاهدنا حب وكرامة
زي سرب القماري صعدنا
في لحظة وقوع الطامة
إتوسمنا خير وقعدنا في جحر الأفاعي السامة
شن طعم القيادة بعدنا شن معناه طولة القامة
في القلعة المشيد سورا
قايلين الوراها نشامة
في ذاكرة شعوب محفورة في صدر المعارك شامة
تبت دوشكتا المأجورة
تاكل من حلالا حراما
تتلامع سماحة صورا وأولادنا بتموت قداما

يا عار القيادة العامة
#يا_عار_القيادة_العامة
#القصاص_للشهداء

التعليقات مغلقة.

error: Content is protected !!