أنا مالي.. ومالو

16

ناهد قرناص

أرسلت لي قائلة..  يا دكتورة عايزين نأخد رأيك في قصتنا.. نحن أربعة بنات واخونا واحد.. ما شاء الله عليه ما فيهو كلمة.. لما جاء يتزوج عرضنا عليهو كل بنات العائلة والجيران.. لكنو أصر يتزوج زميلته في الجامعة.. والحقيقة هي بنت جميلة ولطيفة.. وبتعرف الاصول وعمرنا ما سمعنا منها كلمة.. في البداية أخونا لما خطبها قال لينا الزولة دي نباتية ما بتاكل لحمة.. لكن بعد ما اتزوجت اكتشفنا انها ( vegan) عديل كدا.. يعني بترفض تأكل حتى المنتجات الحيوانية لا لبن ولا بيض ولاسمن.. والله يا دكتورة أخونا دا كان صحته سمحة.. لكن هسه بقى ضعيف شديد.. ونحن بقينا خايفين عليهو وأمي طوالي بقت تقول ليهو الزولة دي بتقتلك بالجوع.. وهسه بقت تقول ليهو خلاص كان هي ما عايزة تعمل ليك الأكل حقك عرس واحدة تانية.. وأخوي بقول انو مبسوط والأكل النباتي صحي.. أها نحن يا دكتورة عايزين تورينا نعمل شنو عشان نحافظ على أخونا وبيتو).

الله يجزيك الف خير يا بنتي على نيتك الطيبة.. لو عايزة نصيحتي .(أفضل حاجة تعملوها انتي واخواتك عشان تحافظوا على اخوك وبيتو.. انكم تخلوه في حالو).. الشئ الغريب ان الحياة برغم صعوبتها والساعات التي تنقضي سراعاً قبل أن تكمل ما تريد فعله في اليوم.. رغم كل هذا.. ستجد ان الناس ينشغلون بمشاكل غيرهم الى درجة تنصيب أنفسهم حكاماً يحملون الصافرة.. ويرفعون الكرت الأصفر والاحمر.. ويحتسبون (البالنتي ).. أخاكم يا ابنتي.. رجل راشد عاقل تثبت بشهادته رؤية هلال رمضان.. اختار هذه ال(vegan ) بكامل قواه العقلية.. وهي بدورها لم تخذله وأثبتت انها انسانة طيبة ولطيفة وتحترم أهله واخواته.. وبالمناسبة.. (الفيقان) هذه لا تخرج من الملة ولا تبطل الوضوء.. هي خيار غذائي عادي.. كأن تجد أحدهم لا يحب أكل العصيدة او آخر لا يفضل أكل الباسطة (لا أعتقد انو في زول زي دا.. .ولو موجود المفروض يخضع لعلاج نفسي).. وفي هذه الايام أفضل شئ تجد انسان نباتي.. اللحمة بقت غالية جدا.. وعما قريب سنصير كلنا نباتيين ويمكن نلحق زوجة أخوك ونبقى (فيقانيين ) عديل كداً.. المهم في الامر ان اخاك لم يشتك بل انه سعيد واستفاد من هذه (الفيقنة) واستعاد رشاقته الغابرة.. وحياته عال العال .

مثل الرسالة أعلاه كثيراً ما ترد على بريدي الخاص.. وان اختلفت القصة.. لكن كلها تصب في مصب واحد.. إحدى الاخوات لا يسرها ما يجري في بيت أخيها.. او احدى الأمهات لا يعجبها ما تفعله زوجة ابنها او زوج ابنتها.. ولو سألت إحداهن هل اشتكى هذا الشخص الذي تحكي عنه ؟ لقالت لك (لا أبداً.. بس أنا عايزة مصلحته \مصلحتها ).. والحقيقة ان المصلحة الفعلية تكمن في الابتعاد حبة عشان تزداد محبة.

أسوأ مكان في الجحيم محجوز لأولئك الذين يتدخلون في حياة الآخرين دون ان يطلب منهم ذلك.. بل يحرصون على اجراء التعديلات حسب رؤيتهم.. وكأن أصحاب الحق.. ليسوا براشدين او قادرين على اتخاذ الخيارات الصحيحة.. اتركوا الناس ليعيشوا حياتهم طالما هي لا تؤذيكم ولا تأتي بالقرب منكم.. واتركوا الناس ما تركوكم .

أجمل ما قرات في هذا الصدد.. قيل ان أحدهم في القطار جلس بالقرب من طفل كان يأكل شوكولاتة.. قال الرجل للطفل (هل تعرف ان الشوكولاتة تسبب تسوس الأسنان؟ ).. فقال الطفل (جدي عمر طويلاً مات وعمره يناهز 110 عام).. فقال له الرجل (هل كان يأكل شوكولاتة ؟).. الطفل (لا.. ولكنه كان لا يتدخل في شؤون الآخرين).

 

التعليقات مغلقة.