ياحليل السياسة وياحليل زروقا

69

ياحليل السياسة وياحليل زروقا

حليلو المرضي وياحليل الفهم والروقة

نور الدين حليلو الدمو ساقي عروقا

حليلو خضر حمد الهيلو مامسروبة

*     *     *

حليل يحي وبلاغتو الفرضة في تقديري

وحليل يحي البيعرف غنوتي وتشطيري

وياحليل ميرغني وخلف الله والدرديري

حليل البطل بطل الجهاد حمادنا

الوجهنا في يوم الكريهة وقادنا

نحن مع الرجال الشرفا نلنا مرادنا

اصلحوا دا المخاض كان في الشريف ميلادنا

*        *         *

وين ناس شيخ العرب ابسن محمد ساسا

وسيف أولاد جعل الحاج محمد راسا

رجال المؤتمر الختو لينا أساسا

إسماعيل زعيمها وتاجها ونبراسا

*          *           *

تاريخم مسجل في الأزل قبالي

وفي الجزيرة ناس علقم وشيخ الوالي

ود جبريل مربط لي صفوفا موالي

وكان الشيخ علي الشامخ وصوتهم عالي

كان نورهم يلوح في ظلمة الاهوالي

*         *          *

كان المفتي ود المفتي صاحب الدار

وعبدالمنعم الثائر بصحي الدار

وود عوض الله ناس كلهم ندار

وود الهندي زي قمر ألسبوع الدار

*         *         *

ديل المانضالهم تروهات وسفاهة

ديل الماكفاحهم افتراءات وتفاهة

ديل الجمهرة الحفظت معاها وفاها

أقطاب البلد نعمة وكفاها كفاها

ديل النارت الظلمة الزمان بي وفاها

وكانو انشافو في عكرها ويعافو صفاها

وكل واحد يشيل فوق كتفو واتلافاها

لا نهبوها لا زول منهم سفاها

*        *          *

ماكان فيهم الشمشار ولا الهمباتا

ولا سووا المصانع زي مصانع باتا

إستقلال نضيف مضفور كانو سباتا

سوهو الرجال الشوفنا نحن ثباتا

*       *         *

كانو بيدركو القصة وبعرفو أسبابا

وكانت دولتم مستورة بي قربابا

بعد مافاتو أصبح حالنا حال التابا

واقفين قصبة لاقندول ولاورتابا

*        *        *

انرفع العلم وانتو الغزلتو قماشو

والفي سوحكم الأحرار دوام بتماشو

إسماعيل وقف وخلفو الأشقاء هاشو

والموج انهدر من نيلو لاعند قاشو

*         *         *

كانو مسلحين بي كل روح ومهارة

ومالين المحافل بي فهم وجدارة

مافيهم عبوب منفوخ ولا طنطارة

ولا فيهم تعيس بتعشا بالفطارة

ولاهم زمبعوب بقودهم الباجبارة

كان فيهم احدب الواقعة النقع صقارة

واصلين لي المكيكب قوسو فايت الدارة

المناضل / الزين الجريفاوي / رحمة الله

التعليقات مغلقة.