مرثية الامين السرورابى فى (الشريف حسين الهندى)

64

في الذكرى الـ 36

خبر الشؤم بلغ..الليله جابو الناعى

قال مات الهمام ناير البصيرة الواعى

اندك الأساس ..وخر السقف مداعى

وأنفرط القطيع ،بقى لادليل لاراعى

الموت سنة ..لكن الفقد مو هين

يالهندى المجرد حاد سقايتو تزين

رحيلك لوع العنقالى والمتدين

السودان نكب يالدخرى فيك يوم فقدك

وياصلب الشكيمة المت حافظ عهدك

والارضين تعج..يوم ربعولك لحدك

اهتزت جبال مكه..وضرائح جدك

قنديل الكبس الضوه مو ممحوق

واب قدرا على عالى الكواكب يفوق

أظنك يالشريف زايد عليك الشوق

وهزاك الحنين للأزهرى وزروق

فى السودان كل النفوس موجودة

وكانت عايشه آمالا .عليك معقوده

لكن شن نسو ..ماتمت المعدودة

حكم السيد رضا..وارادتو مى مردوده

فوضنا الأمر فيك للكريم مولاك

وتاريخك بخلد للنشور ذكراك

سائلينو الكريم الاخلصك حباك

يبرد مرقدك وعقب الجنان مثواك

التعليقات مغلقة.